Húllumhæ og boðið í bíó!

Þá er dagur 4 að baki og sá var skemmtilegur. Börnin byrjuðu á því að borða morgunverð eftir að umsjónarmennirnir höfðu vakið hópana sína og svo var haldið á námskeiðin. Þau stóðu frá 10-12 í morgun því að þetta var húllumhæ-dagurinn sjálfur. Annars eru þau vanalega á námskeiðum frá kl. 14-16. Námskeiðin ganga mjög vel og margt skemmtilegt er að verða til sem springur svo út fullbúið á lokakvöldvökunni. Kvikmyndagerðin er t.d. komin með kvikmyndaver í einni stofunni og er að sjálfsögðu að búa til stórmynd þar sem m.a. draugar koma við sögu ... hvað annað!

Í hádeginu boðuðu börnin hrísgrjónagraut af bestu lyst og melónur líka sem eru heldur betur vinsælar og oft á boðstólum í Ævintýralandi.

Þegar allir voru búnir að fara með diskana sína á Sigurjón, vagninn góða undir leirtauið, var sest niður og beðið ... en eftir hverju? Jú, eftir smástund birtist starfsfólkið í glæsilegum búningum og húllumhædagurinn var settur formlega en þó ekki fyrr en eftir smásprell. Inga Lára var á veiðum, eins og sjá má á myndinni af henni hérna fyrir ofan og fólkið var allt saman að springa úr fjöri!!!

 

Á húllumhæ-dögum er byrjað á því að fara í fánaleikinn, þennan æsispennandi þar sem hópnum er skipt í tvö lið, Draum og Martröð.

 

Krakkarnir í Draumi fá rauða stríðsmálningu í andlitið og þau í Martröð bláa. Svo er hlaupið út um víðan völl og „barist“ ... um þvottaklemmur. Skemmtilegur leikur sem hefur alltaf slegið í gegn í sumarbúðunum í hverri viku í mörg sumur. Annars eru útileikirnir sem boðið er upp á á útisvæðinu ótal margir og hver öðrum skemmtilegri.

 

Veðrið var eitthvað skrýtið í dag, ólíkt því sem það hefur verið, loftið hreyfist frekar hratt og svo datt eitthvað blautt niður úr himninum ... við munum bara eftir sól í sumar! Við reiknuðum því ekki með að margir vildu taka þátt í fánaleiknum, sem alltaf fer fram utandyra, en þau voru ótrúlega mörg sem vippuðu sér í bomsurnar, fengu stríðsmálningu og drifu sig út í fjörið. Boðið var upp á leiki í íþróttahúsinu fyrir hina og sitt af hverju fleira og þegar klukkan sló kaffi fékk allur mannskapurinn heitar vöfflur með súkkulaðiglassúr og rjóma! Það rann sko ljúflega niður og það í miklu magni.  

Eftir kaffi var m.a. boðið upp á skartgripagerð og tóku þátt bæði strákar og stelpur að vanda. Bandfléttur og tattú, þetta sí-sívinsæla dæmi var í gangi en það verður að vera það nokkuð oft til að allur hópurinn geti fengið a.m.k. eitt tattú og stelpurnar bandfléttu. Börnin sem ætla að taka þátt í Söngvara- og hæfileikakeppninni Ævintýrabarkanum sem fram fer í kvöld, sunnudag, ætluðu að æfa í klukkutíma eftir kaffi en það endaði í þremur tímum, svo mikið þurfti að æfa, að sögn Gumma karaókístjóra.

 

Spákonan Jósefína Potter var mjög spúkí en samt rosalega vinsæl. Tíminn fram að mat leið mjög hratt og allt í einu var klukkan bara orðin sjö og komið að pylsupartíinu. Þar sem stranglega er bannað að vera svangur í matsalnum borðuðu sig allir pakksadda. Kvöldið var frekar rólegt að þessu sinni sem var gott eftir ærslafullan dag en þeim var boðið í „kvikmyndahús“ með tveimur sölum ... eða vídjókvöld, eins og það heitir í sumarbúðunum. Tvær myndir í boði, önnur fyrir þau yngri og hin fyrir eldri krakkana. Popp og safi í hléinu, bara fullkomið, allir sáttir.

 

Þá var það bara draumalandið en fyrst var lesnir nokkrir kaflar úr framhaldssögunni sem hver hópur velur í upphafi og lesið er þangað til augnlokin verða blýþung. Það er svo gott að láta lesa fyrir sig. Nýlega heyrðum við haft eftir dönskum kennara, sem hefur kennt íslenskum börnum í Danmörku, að ástæðan fyrir mikilli velgengni þeirra í skóla þar úti sé sú að mikið er lesið fyrir þau heima. Það er ekki svo galin skýring, svona með gáfum og gjörvileika okkar fólks ;)

Nýjar myndir eru komnar inn á www.sumarbudir.is, tímabil 5, dagur 4 + dagur 4-framhald.

Sendum frábærar stuðkveðjur frá Kleppjárnsreykjum.