Gullpeningar og glæstir „barkar“

Dagur fimm rann upp ... bara ótrúlegt hvað tíminn hefur verið fljótur að líða. Bæði börn og starfsfólk skilja ekkert í þessu.

Eftir morgunverð af hlaðborðinu góða var farið í íþróttahúsið, útisvæðið, á karaókíæfingu (hæfileikakeppnin að skella á) og svo drifu sig margir út í sundlaug til að fara í sturtu. Spilaborgin var opnuð og einhverjir voru líka inni í herbergjum að leika og spjalla.

Í hádeginu var boðið upp á pasta og hvítlauksbrauð og mikið borðað að vanda. Strax á eftir voru hádegisfundirnir með umsjónarmönnunum. Leyndinni var létt af furðubréfunum sem umsjónarmennirnir höfðu fengið undanfarna morgna. Börnin fengu gullpening, ég legg ekki meira á ykkur. Við heyrðum því reyndar fleygt að þetta hefði verið súkkulaðipeningur með gullpappír utan um en það var a.m.k. mikil ánægja með gullið ...

Námskeiðin voru í gangi milli kl. 14 og 16 og allt í sómanum þar að vanda, mikill undirbúningur fyrir stóra kvöldið, sjálfa lokakvöldvökuna.

 

Í kaffinu var sumarbúðasandkaka, tekex með marmelaði, melónur og restin af vöfflunum.

 

Reiðnámskeiðsbörnin fóru til hestanna sinna skömmu fyrir kaffi með nesti og nýja skó og þegar þau komu til baka rétt fyrir kvöldmat skiptu þau um föt, eins og hin börnin þar sem Ævintýrabarkinn var fram undan.

 

Spilaborg var opin seinnipartinn og útisvæðið, einnig voru börnin inni á herbergjum, þau sem vildu, það er alltaf voða sport líka.

Í kvöldmat var ofboðslega góður fiskur með kartöflum, smjöri og tómatsósu og ótrúlega gaman að stappa í flott listaverk sem brögðuðust svoooo vel.

 

 

Svo var það bara Ævintýrabarkinn sjálfur, fyrstu myndirnar þaðan hér fyrir ofan:

Mikil stemmning ríkti í íþróttahúsinu, áhorfendur voru spenntir og keppendur líklega enn spenntari. Atriðin voru hvert öðru glæsilegra og mikið lagt í þau. Miklar stjörnur hér á ferð, bæði söngvarar, dansarar, hoppaígegnumgjörð-, boltahaldararmeðnefinu- og klappasamanmeðannarri-snillingar.

Kharl Anton sem sýndi trylltan Michel Jackson-dans með miklum tilþrifum og við mikinn fögnuð áhorfenda. Hann dansaði sig í fyrsta sætið.

Erla Svanlaug söng og dansaði frumsaminn dans, ásamt Önnu Helgu, Katrínu og Sólbrá Birtu sem einnig sungu bakraddir. Hún tók lagið Tip Top skinka og annað sætið varð þeirra.

Elísa Líf söng lagið Apricot Stone og dansarar með henni voru Fanndís og Ragnheiður Helga en þær tóku þriðja sætið.

Aðrir keppendur sýndu líka mikla snilld:

Davíð Þór hélt á bolta með nefinu og Guðmundur Jökull klappaði með annarri hönd.

Kristbjörn Elías og Pétur Lárus sýndu stórkostlegt sirkusatriði, hoppuðu í gegnum húllahring á mörgum hæðarstigum.

Hugrún Ósk söng lagið Satelite og dansarar með henni voru Ásdís María og Helga Dögg.

Ragnheiður Dóra söng Playing with fire og dansarar voru Kristín Sesselja og Harpa.

Öll börnin fengu viðurkenningarskjöl fyrir þátttökuna og fyrir efstu þrjú sætin voru veitt verðlaun.

 

Þá var það bara hjartans besta kvöldkaffið, brauð og safi, framhaldssagan góða og síðan draumalandið.

 

Síðasti heili dagurinn fram undan, lokakvöldvakan, hátíðarkvöldverður, stutt í heimferð ... bara allur pakkinn.

 

Við sendum okkar allra bestu Ævintýrabarkakveðjur frá Kleppjárnsreykjum.

 

P.s. Myndir frá degi 5: http://sumarbudir.is/sumarbudir/t3d5.html

Húllumhæ með vöfflupásu

Dagur fjögur var svolítið öðruvísi en hinir dagarnir. Námskeiðin voru haldin fyrir hádegi ... og ástæðan? Jú, húllumhædagurinn sem stóð frá hádegi til kvölds með vöfflupásu og svona ...

Allt gekk vel á námskeiðunum, enda allir vel vakandi og saddir og sælir eftir morgunverðinn. Það var skapað í hverju horni, málað, leikið, myndað, dansað, hoppað og skoppað ... Hlaupandi hettur í ýmsum litum með körfur voru úti um allt og kvikmyndavél á hælum þeirra og fleiri flottra leikara. Þetta verður áhugaverð stuttmynd, við hlökkum heldur betur til lokakvöldvökunnar þegar við fáum að sjá myndina og hinar sýningarnar. Grímugerðarhópurinn er enn mjög dularfullur um látbragðsleikritið en í vinnustofunni sáum við þó fjölda æðislegra listaverka. Okkur hefur sem betur fer náðarsamlegast verið leyft að kíkja á dansæfingarnar. Svo var allt í einu komið hádegi!

Sérlega góður grjónagrautur með kanilsykri var í matinn og var borðaður með allra bestu lyst. Enn eitt fljúgandi bréfið barst til umsjónarmannanna um morguninn sem báru skilaboðin áfram á hádegisfundunum til barnanna sem neita enn að gefa nokkuð upp. Hrmpf ...

Þá var haldið á útisvæðið þar sem sumarbúðastjórinn setti húllumhædaginn. Hún var með gjallarhorn og páfagaukurinn Gorían hermdi eftir nánast öllu sem sagði við mikla lukku. 

Að vanda var byrjað á fánaleiknum þar sem liðin Martröð og Draumur börðust út um víðan völl um fánana. Á endanum sigraði Martröð eftir harða keppni. Síðan var slakað á í sólskininu því örstutt var í kaffitímann.

Ilmurinn úr eldhúsinu var ótrúlega lokkandi, enda kom í ljós að snillingarnir þar á bæ höfðu ráðist í vöfflubakstur á meðan fánaleikurinn stóð yfir, þeytt rjóma, tekið til sultu og slegið í súkkulaðiglassúr. Að borða vöfflur með glassúr og rjóma er eins og bolludagurinn endurborinn. Eiginlega bara betra. Svo var hægt að fá sultu líka á vöfflurnar.

Eftir kaffi var haldið áfram þar sem frá var horfið, eða með húllumhædaginn. Margt var í boði, m.a. spákonan Jósefína Potter frá Borgarnesi sem var í glæsilegum spákonubúningi. Ýmsir þóttust þekkja þarna starfsmann og fannst miklu skemmtilegra að geta upp á því hver spákonan væri en hvað hún segði. Hún var þó mjög skemmtileg en ákaflega dularfull. Svo hvarf hún bara sporlaust. Kannski hefur hún flogið á kústi til Borgarness ... eða ekki. Var þetta kannski Geir?

Skartgripagerð var í boði, tattú, andlitsmálun, keilukeppni (Wii), bandfléttur, sápukúlusprengikeppni og vinabandagerð. Sumt úti, annað inni. Sá sem sprengdi allra flestar sápukúlurnar var Bjarni Þór í Sæljónum. Dómarinn var mjög smámunasamur og engin sápukúla fór fram hjá honum. Í keilukeppninni varð Sólbrá Birta í Hafmeyjunum hlutskörpust.

Í kvöldmatinn voru grillaðar pylsur með öllu og það fannst engum leiðinlegt, eiginlega bara frekar æðislegt.

Síðan var haldið bíókvöld og í stað ávaxta eða brauðs var kvöldkaffið poppkorn og safi sem var sérlega viðeigandi.

Eftir þennan viðburðaríka dag sofnuðu börnin vært eftir að hafa hlustað á kvöldsöguna. 

Veðurspáin fyrir dag 5 er ekki amaleg. Fimmtán stiga hiti um hádegisbil, skýjað með köflum og síðan dropar um kvöldið ef marka má hirðveðurspá sumarbúðanna: http://www.yr.no/place/Iceland/Vesturland/Kleppj%C3%A1rnsreykir/

Grillpylsu- og húllumhækveðjur frá Kleppjárnsreykjum!

P.s. Myndir dagsins: http://sumarbudir.is/sumarbudir/t3d4.html

Dúndrandi diskó á pítsudegi

Margt ótrúlega skemmtilegt gerðist á þriðja degi, eins og óvænt leikrit í íþróttahúsinu og haldið ykkur ... alvörudiskótek um kvöldið, og váts, hvað maturinn var góður ... og veðrið æðislegt! 

Vel var tekið til matar síns í matsalnum um morguninn, sumir fengu sér bara eitthvað eitt uppáhalds af hlaðborðinu, aðrir prófuðu allt og það má alveg. Enginn setti þó hafragraut ofan á ristað brauð eða út í súrmjólkina, það hefði samt verið frekar fyndið.

 

Margt var í boði eftir morgunverðinn, stöðvar opnar og um margt að velja, íþróttahúsið, útisvæðið í steikjandi hita, Spilaborg og sund ... en íþróttahúsinu var þó fljótlega lokað því flestir vildu vera úti í sólinni. Þátttakendur í Ævintýrabarkanum fóru á æfingu og einhverjir völdu að fara í hina skemmtilegu kertagerð.

Í kertagerðinni eru notaðar bláskeljar undir kertavaxið sem umsjónarmaður bræðir og hellir varlega í skelina sem hvert barn fær og kveikur settur í. Þegar vaxið er farið að storkna skreyta börnin kertin sín m.a. með hrísgrjónum, baunum og glimmeri. Sumarbúðastjórinn og háæruverðug systir hennar fara alltaf á hverju ári, jafnvel tvisvar á ári, í Hvalfjörðinn þar sem heilu bláskeljahreiðrin bíða eftir að vera tínd ... eða þannig. Svo eru skeljarnar þvegnar vel og vandlega og henta svona líka vel í kertagerðina. Bara æði.

Fyrra stúlknamet dagsins setti ráðskonan í hádegisverðinum en þá bauð hún upp á mjög svo góða kakósúpu með tvíbökum og síðan voru ávextir á eftir.

Umsjónarmennirnir sögðu svo börnunum á hádegisfundunum frá þessum undarlegu aðferðum sem hafa verið notaðar til að vekja þá. Bréfi fleygt í andlitið og svo hlaupið út. Og ekkert smá mikilvæg skilaboð þar til barnanna með loforði um framhaldi næsta dag.

 ----------     -----------       ----------     ---------

Eftir hádegisfundina var farið út í íþróttahús en þar var börnunum boðið upp á spennandi, fyndið og lærdómsríkt leikrit um Ping og Pong annars vegar og hins vegar Sing og Song.

Þau Ping og Pong gáfu börnum (sem starfsfólk lék) góð ráð úr vélinni Góðráð og var sérstaklega tekið á einelti. Dæmi voru sýnd hvernig misjöfn viðbrögð geta breytt erfiðum aðstæðum, og þá til góðs. Börnin horfðu spennt á, enda spennandi að sjá vél sem gat talað og gefið svona líka góð ráð.

Sing og Song voru algjörlega ósammála um alla hluti, eins og þegar Heiða var óörugg í sambandi við ýmsa hluti, trúði ekki að hún gæti nokkuð í prófinu sem Song tók undir en Sing ekki. Song ráðlagði henni eindregið að adda öllum á Facebook og MSN en Sing varaði hana við því og börnin í salnum voru greinilega algjörlega sammála Sing. Þegar Heiða hitti ókunnugan mann sem bað hana um aðstoð með hvolpa. Mamma hvolpanna væri dáin og hann ætlaði með litlu krúttin til dýralæknis til að fá hjálp með þá. Sing sagði Heiðu að segja bara við manninn að hann ætti að biðja einhvern úr eigin fjölskyldu að hjálpa sér, ekki ókunnugt barn ... en þessi ruglaði Song sagði Heiðu að maður ætti alltaf að fara upp í bíl með ókunnugum. Þá sprakk salurinn úr hlátri - börnin vissu greinilega að svoleiðis gerði maður aldrei. Davíð lék Song en María lék Sing. Heiða lék Heiðu.

Vel gekk á námskeiðunum. Í kvikmyndagerðinni standa tökur yfir en myndin fjallar um átta systur sem heita Rauðhetta, Bláhetta, Boxhetta, Grænhetta, Fjólubláhetta, Hvíthetta, Svarthetta og Gulhetta. Úlfurinn í myndinni er svolítið ruglaður en hann heldur að hann sé hæna. Amman er nokkuð venjuleg en ýmis skrímsli og undarlegar verur koma við sögu.

Ekki að spyrja að hugmyndafluginu hjá börnunum sem sáu alfarið um handritsgerðina.

 

 

Dansinn gengur glimrandi vel og hjá grímugerðar- og myndlistarhópnum er látbragðsleikrit í vinnslu og ekkert gefið upp að svo stöddu. Þessi börn geta verið svo dularfull þegar þau vilja það við hafa. Allt á að koma í ljós á lokakvöldvökunni.

 

Í kaffinu var sumarbúðasandkaka og tekex með heimalöguðu marmelaði. Skömmu fyrir kaffi fóru reiðnámskeiðsbörnin til Guðrúnar Fjeldsted reiðkennara sem heldur námskeiðin og tóku með sér nesti.

 

Sólin sem hafði skinið skært allan daginn hvíldi sig aðeins eftir kaffið og þá var ekki jafn rosalega heitt á útisvæðinu. Þar var hluti barnanna að leik, einnig í íþróttahúsinu og í Spilaborg. Skömmu fyrir kvöldmat fóru allir í herbergin sín og skiptu um föt ... fóru í diskógallann, takk fyrir.

 

 ----------     ----------     ----------     ----------     --O--     ----------    

 

 

Í kvöldmatinn var pítsa! Ekki bara ein, heldur fjölmargar, ein hefði nú dugað skammt ofan í fjölda svangra barna sem vita kannski fátt betra en pítsu! 

Svo dunaði dansinn fram eftir kvöldi. Flott tónlist, reykvél og fjörugir krakkar = brjálað stuð.

Meira að segja hinir mestu dansarar þurfa stundum að taka sér pásu og þá var ekki amalegt að fá tattú eða bandfléttur í hár sem var í boði frammi.

Eftir ávaxtahressingu í kvöldkaffinu var það bólið og kvöldsagan góða sem hver umsjónarmaður las fyrir hópinn sinn. Svo bara draumalandið.

Stuð- og diskókveðjur frá Kleppjárnsreykjum ... með dassi af tattúi og bandfléttum!

P.s. Myndir dagsins:

http://sumarbudir.is/sumarbudir/t3d3.html

Rauð-, Blá- eða Gulhetta?

Annar dagurinn var hreint ævintýri frá upphafi til enda og má þar nefna hárgreiðslukeppni, draugaleik, undarlega vakningu á umsjónarmönnum, Blá-, Rauð- eða Gulhettu, gott veður og hvaðeina en byrjum á byrjuninni, morgunverðarhlaðborðingu sjálfu. Þar var ævintýralegt úrval; súrmjólk, kornflakes, ristað brauð með osti/marmelaði o.fl., hafragrautur ... eiginlega allt nema egg og beikon en stundum harðsoðin egg ofan á brauð ...

Stöðvarnar voru opnaðar strax eftir morgunmat, íþróttahúsið, útisvæðið, Spilaborg og sund. Einnig var fyrsta karaókíæfingin, eða æfing fyrir Söngvara- og hæfileikakeppnina Ævintýrabarkann. Margir eru skráðir þátttakendur og munu sýna ýmsa aðra hæfileika en söng.

Núðlusúpa og smurt brauð með m.a. kæfu og harðsoðnum eggjum var í hádeginu og börnin tóku vel til matar síns.

Hádegisfundir voru haldnir hjá hópununum eftir matinn en þar eru ýmis mál tekin fyrir, spjallað, tekinn púlsinn á líðan barnanna og farið í leiki.

Umsjónarmennirnir höfðu heldur betur fréttir að færa en um morguninn voru þeir vaktir á furðulegan hátt. Bréfi var fleygt í andlitið á þeim og þegar þeir opnuðu augun var viðkomandi bréfberi horfinn. Verulega dularfullt. Í bréfunum voru mikilvæg skilaboð til barnanna og því bætt við að annað bréf kæmi morguninn eftir með framhaldi.

Og svo voru það námskeiðin.

Í kvikmyndagerðinni var mikið rætt um handrit að stuttmyndinni sem gerð verður og það eina sem við fengum upp úr hópnum var að mikið hefði verið talað um Rauðhettu, Bláhettu og Gulhettu. Fleiri upplýsingar fengum við hreinlega ekki. Sum börnin voru komin í búninga og tökur voru hafnar. Þeir sem ekki voru nákvæmlega í þeim tökum fóru í Spilaborg og skemmtu sér þar, mun betra en að sitja og hanga, eins og margar kvikmyndastjörnur kannast vel við. (mynd t.h. hér að ofan)

Grímur voru gerðar í stórum stíl og þegar þær hafa þornað verða þær málaðar og teygja sett á þær til að þær haldist á sínum stað. Vinna við handrit látbragðsleikritsins er gerð meðfram grímunum, enda eru þær gerðar í stíl við innihald leikritsins.

Danshópurinn æfði líka af mikilli einbeitni og gleði, enda hvað er skemmtilegra en að dansa? Það verður ógurlega spennandi að sjá atriðið þeirra á lokakvöldvökunni.

 

Í kaffinu var boðið upp á köku og melónur.

 

Svo hófst hin vinsæla hárgreiðslukeppni þar sem bæði strákar og stelpur tóku þátt. Svo margir vildu greiða að það þurfti að finna starfsmenn í hlutverk módela, a.m.k. einn ...

Í fyrsta sæti varð Erla Svanlaug en módel hennar var Katrín. Annað sætið hreppti Þóra en hún greiddi Anítu. Í þriðja sæti urðu Hugrún Ósk og Andri Már en þau greiddu Ásdísi Maríu. Frumlegustu greiðsluna átti Kristín Sesselja en módel hennar var Ragnheiður Dóra.

Aðrir þátttakendur, bæði módel og hárgreiðslufólk: Brynja Gná, Selma, Elísa Líf, Harpa, Grethe María, Kristín Helga, Anna Helga, Helga Dögg, Ragnheiður Anna, Sólbrá Birta, Ásta Valgerður, Laufey Erla, Sigfús Andri og Pétur Lárus.

Allir fengu viðurkenningarskjöl fyrir þátttökuna og fyrir efstu þrjú sætin og frumlegustu greiðsluna voru veitt smáverðlaun. 

Útisvæðið var líka opið og íþróttahúsið og svo fórum börnin inn í herbergi í smástund fyrir kvöldmatinn til að slaka á og bera á sig eftirsól ... eða after sun. Veðrið leikur þvílíkt við okkur.

Í kvöldmatinn var steiktur fiskur með hrísgrjónum og hægt að velja um karrísósu eða súrsæta sósu með. Afar góður fiskur sem féll í kramið hjá börnunum. 

Kvöldið hófst á brennókeppni milli hópa, í íþróttahúsinu. Sigurvegarar voru Höfrungar, í öðru sæti Gullfiskar og Sæljón og í því þriðja voru Hafmeyjar. Spennandi og jöfn keppni.

Svo var það draugaleikurinn ... úúúúú. Hann var æsispennandi. Tvö börn úr hverjum hópi eru valin til að keppa fyrir hönd hóps síns og þurfa að komast í gegnum erfiða þraut ... eða að hlaupa hratt nokkurn spöl að draugaherberginu og fara síðan inn í það (líka hratt) þrátt fyrir draugalega tónlist, reyk (reykvél sko) og ógurlega drauga sem reyna að tefja barnið (eitt barn í einu) við að hlaupa í gegnum herbergið í nánast myrkri, finna fötu með "slímugu" vatni og ná í stein á botninum til að rétta starfsmanni. Með yngri börnunum fer alltaf hugrakkur starfsmaður í gegnum þetta. Hraðinn skiptir ógurlega miklu máli og í þetta skiptið voru Hafmeyjar langfljótastar, þær fóru nánast á ljóshraða ... Gullfiskar voru næstfljótastir og Höfrungar í þriðja sætinu. Geir umsjónarmaður lék aðaldrauginn og elstu starfsmannabörnin aukadraugana ... Leiknum lauk með því að Davíð umsjónarmaður hljóp "ofsahræddur" fram í matsal undan drauga-Geir sem tók síðan niður grímuna. Öll börnin fengu þó áður að kíkja inn í draugaherbergið og láta "hræða" sig svolítið. Algjört stuð.

Mikið var spjallað og hlegið í kvöldkaffinu yfir smurða brauðinu og safanum eftir þennan skemmtilega draugaleik.

Svo var bara háttað og síðan sofnað rótt eftir lestur framhaldssögunnar góðu og ævintýraríkan dag.

 

Sólbrúnar stuðkveðjur frá Kleppjárnsreykjum.

P.s. Myndir frá deginum eru hér:

http://sumarbudir.is/sumarbudir/T3D2.html

Dúndurfjör á fyrsta degi

Um tvöleytið í gær kom full rúta af hressum og kátum krökkum í sumarbúðirnar, einhverjir komu með einkabíl líka um svipað leyti. Umsjónarmenn hvers hóps söfnuðu til sín ungunum sínum þegar allir voru komnir. Hóparnir heita t.d. Sæljón, Hafmeyjar, Höfrungar og allt í þeim dúr og það er sko ekki amalegt að eiga sinn eigin umsjónarmann allt tímabilið - sem vekur mann á morgnana, borðar morgunmatinn með manni, heldur skemmtilega hádegisfundi með hópnum, les kvöldsöguna o.s.frv.

Byrjað var á því að koma farangrinum inn á herbergin og síðan hélt hver umsjónarmaður með hópinn sinn um svæðið, sýndi allt bæði úti og inni og eftir það var hægt að fara að koma sér kósí fyrir.

Skúffukakan í kaffinu sló auðvitað í gegn ásamt melónunum sem runnu hratt niður eins og melóna er siður. 

Þá kom að því að allir hlupu út í íþróttahús því nú skyldi kynna starfsfólk og námskeiðin sem í boði verða alla vikuna í tvo tíma á dag. Afraksturinn verður síðan sýndur á lokakvöldvökunni. Einnig völdu börnin sér álegg og safategund fyrir kvöldkaffitímana en ýmist er boðið upp á ávexti eða brauð þá. Þá er hægt að ganga að uppáhaldinu sínu.

Vinsælasta námskeiðið var, eins og oft áður, kvikmyndagerðin og þar á eftir dansinn. Þar sem sérlega vel hefur komið út að prófa að sameina grímugerð og listaverkagerð gerðum við það. Sá hópurmun því bæði gera listaverk fyrir sýninguna á lokakvöldinu og einnig grímur og sýna látbragðsleikrit. Það námskeið var líka ótrúlega vinsælt.

Snæfríður, frábær stelpa sem var líka hjá okkur í fyrra, mætti með sérstök gleraugu með sér sem hún leyfði hinum börnunum að prófa. Snæfríður sér mjög illa þótt fæstir myndu trúa því, svo dugleg er hún að taka þátt í öllu. Gleraugun sem börnin prófuðu sýndu þeim heiminn eins og Snæfríður sér hann, eða í algjörri móðu. Alltaf gott að setja sig í spor annarra til að skilja betur hlutina. 

Eftir góða stund í íþróttahúsinu voru stöðvar opnar: Útisvæðið, Spilaborg og íþróttahúsið. Á útisvæðinu eru ýmis leiktæki, m.a. tvö trampólín. Fjöldi skemmtilegra tækja er einnig að finna í íþróttahúsinu, dýnur og rimla og í Spilaborg ... úps, hvar á ég að byrja ... spil af nánast öllum gerðum, púsl, bækur, billjarð, borðtennis og fleira og fleira. Börnin fóru á milli stöðva og vildu prófa allt. Bara gaman eða öllu heldur, dúndrandi fjör!

Í kvöldmat bauð æðislega eldhúsið okkar upp á kjöt og spagettí sem var borðað af bestu lyst.

Síðan var sundlaugin opin og var svamlað í henni og setið í heita pottinum fram eftir kvöldi. Þeir sem vildu fóru í sund, hinum var boðið upp á aðrar stöðvar.

 

 

Ávextir voru í boði í kvöldkaffinu og þegar allir voru komnir upp í rúm settist umsjónarmaður hvers hóps niður og las kvöldsöguna. Spennandi og skemmtilega framhaldssögu. Fyrsta kvöldið er alltaf lesið lengi þar sem lesturinn er sem besta svefnmeðal ... sumum finnst erfitt að sofna á nýjum stað. Að lokum sofnuðu allir og næturvörðurinn tók við.

Innilegar sund-, heitapotts-, skúffuköku- og kvöldsögukveðjur frá Kleppjárnsreykjum!

P.s. Myndir frá fyrsta deginum eru hér: http://sumarbudir.is/sumarbudir/t3d1.html

Mikið hlegið á frábæru lokakvöldi

Lokadagurinn rann upp bjartur og fagur og allir hlökkuðu brjálæðislega til kvöldsins en að vanda var byrjað á því að vakna, bursta tennur, hlæja, klæða sig, fara í morgunmat og borða vel af hlaðborðinu.

 

Námskeiðin voru haldin fyrir hádegi þar sem þetta var dagur hinna miklu æfinga og næstsíðasta höndin lögð á sitt af hverju og sú síðasta á sumt. Danshópurinn flotti æfði í íþróttahúsinu þar sem sýningin átti að fara fram, enda dugði ekkert minna en heilt risastórt íþróttahús fyrir skvísurnar. Í hverju skoti voru spenntir krakkar við undirbúning.

 

Í hádegismat var skyr og einnig smurt brauð og svo var farið í að pakka niður, enda heimferðin næsta dag.

 

Þá voru það bara námskeiðin aftur, svona loka-, loka-, lokaundirbúningur sem gekk frábærlega vel. Allra síðustu breytingar voru gerðar og allt fínpússað.

 

 

Hluti barnanna fór síðan í góða gönguferð og hafði mikla ánægju af því að fá að vaða, þvílík sæla. Sumir vildu ekki vökna í fæturna (sjá mynd til hægri) á meðan aðrir fóru hreinlega á bólakaf (sjá fleiri myndir á heimasíðu). Svo var hægt að liggja í vatninu og sóla sig. Veðrið lék alveg við okkur.

 

Í kaffitímanum var haldið upp á 11 ára afmæli Stefáns Inga. Allir fengu afmælistertusneið, afmælisbarnið fékk skreytta sneið með kerti á, afmælispakka og afmæliskort og svo sungu allir afmælissönginn. Alltaf rosagaman að eiga afmæli í sumarbúðunum. Svo voru líka melónur á boðstólum og tekex með appelsínumarmelaðinu góða a la Sigurjóna.

Eftir kaffi fór hluti hópsins í ruslatínslu - þátttakan var góð og á eftir sást varla laufblað sem ekki var fast við tré allt í kringum sumarbúðirnar svo fínt varð allt og vel sópað. Allir sem höfðu tekið þátt fengu að velja sér litla gjöf, smá þakklætisvott frá sumarbúðunum úr sérstökum ruslatínslu-verðlaunakassa.

Útisvæðið var mjög vinsælt, enda veðrið til að hrópa ferfalt húrra yfir og einhver hluti hópsins fór í íþróttahúsið.

Skömmu fyrir kvöldmat héldu börnin til salarkynna (herbergja) sinna og skiptu um föt fyrir kvöldið, allir vildu vera í sínu fínasta pússi þegar hátíðarkvöldverðurinn var snæddur ... fyrir hátíðarkvöldvökuna sem hafði verið stefnt að frá degi eitt ...

Ánægjan yfir kvöldverðinum var mikil, enda ekki amalegt að fá hamborgara, franskar, sósu og gos til að skola dýrðinni niður.

Kvölddagskráin hófst með skotbolta íþróttahópsins sem kom blóðinu aldeilis á hreyfingu hjá börnunum.

Síðan sýndi danshópurinn flottan dans. Stelpurnar máttu sannarlega vera hreyknar af frammistöðunni. Þær voru svo yndislegar að endurtaka dansinn fyrir starfsfólk eldhússins sem missti af atriðinu þeirra vegna yfirgengilegs dugnaðar við að gera allt hreint og fínt eftir veislumatinn.

 

Hið sameinaða námskeið grímugerð og leiklist flutti  leikrit sem heitir Ævintýrasirkusinn. Það fjallar um fjórar stelpur sem þrá heitast af öllu að verða frægar dansstjörnur. Þær sjá auglýsingu þar sem auglýst er eftir dönsurum í sirkus og sækja um. Allt er í uppnámi í sirkusinum því einu ljóninu hafði verið rænt þaðan. Sirkusstjórinn segir að það verði enginn sirkus meira nema ljónið finnist. Stelpurnar eru svo klárar að þær finna ljónið að lokum og fá vinnuna! Leikritið uppskar mikið lófatak og fagnaðarlæti, enda stórskemmtilegt.

Starfsfólkið sýndi síðan eitt af sínum „skrítnu“ leikritum. Það fær ekki að vita hvaða leikrit verður á dagskrá fyrr en á síðustu stundu og dregur miða úr hatti til að fá að vita hvaða hlutverk það eigi að leika. Það finnst börnunum alltaf ótrúlega fyndið. Núna var það Öskubuska. María lék prinsinn og Geir Öskubusku, Ellen vondu stjúpuna og Davíð og Heiða dætur hennar. Svo voru fuglar, mýs, kisa, grasker, hirðsveinn ... Þetta var hrikalega fyndið og tárin í augum sumra barnanna (og matráðskonunnar) stöfuðu af hlátri, ekki vonbrigðum með  leiklistarhæfileika starfsmannanna. Hahaha.

Lokaatriðið var sýning stuttmyndarinnar Þú getur skráð þig inn en þú getur ekki skráð þig út! Hún fjallar um dularfullt hvarf hótelgesta sem hafa skráð sig á hættulegt hótel. Mjög spennandi og skemmtileg mynd. Börnin sömdu handritið, skipuðu í hlutverk, fundu búninga og léku svo eins og þau hefðu ekki gert neitt annað. Sama má segja um leiklistar- og grímugerðarhópinn.

Ávextir voru borðaðir í síðasta kvöldkaffitíma þessa tímabils og einnig frostpinni. Svo var bara farið í háttinn og allir hlökkuðu til að koma heim eftir skemmtilegan tíma í sumarbúðunum.

Við þökkum kærlega fyrir skemmtilega viku og sendum okkar allra bestu kveðjur frá Kleppjárnsreykjum!

Myndir frá lokakvöldvökunni og öðrum atburðum dagsins eru hérna: http://sumarbudir.is/sumarbudir/t2d6.html

 

 

Hvílíkir hæfileikar!

Eftir morgunmatinn góða var farið í sund eða sturtu - þetta var nefnilega sannkallaður baðmorgunn.

 

Börnin sem tóku þátt í Ævintýrabarkanum, hæfileikakeppninni, hentust á æfingu þar sem dýrðin var um kvöldið. Íþróttahúsið skemmtilega lokkar og laðar þannig að einhverjir fóru síðan þangað á meðan aðrir nutu sólarsælunnar á útisvæði. Skömmu fyrir hádegismat var haldið til herbergja og sólarvörn borin á sig og svo var hlaupið út í sólina.

 

Í hádegismatinn var pasta með hvítlauksbrauði og það vakti aldeilis lukku, eins og allt sem eldhúskrúttin töfra fram handa börnunum.

 

Leyndarmálið um dularfullu bréfin upplýstist á hádegisfundunum en þrátt fyrir það fengum við ekkert að vita. Sum börnin sýndu okkur gullpening sem þau höfðu fengið og líklega leyndist súkkulaði inni í gyllta bréfinu. Nammi namm.

Námskeiðin gengu frábærlega og sífellt styttist í stóru stundina, lokakvöldvökuna.

 

Í kaffinu var sumarbúðasandkaka, tekex með smjöri og/eða heimatilbúnu marmelaði. Skömmu fyrir kaffi fóru reiðnámskeiðsbörnin á hestbak og riðu um fallegar slóðir á góðu barnahestunum hennar Guðrúnar Fjeldsted reiðkennara. Þau fengu nesti með sér og áðu á skemmtilegum stað þar sem þau gátu legið úti í náttúrunni og hvílt sig eins og hestarnir. Börnin komu alsæl rétt fyrir kövlmat og náðu að skipta um föt fyrir Ævintýrabarkann.

Í nógu var að snúast í Ævintýralandi á meðan. Þátttakendur kvöldsins fóru með Heiðu til að setja allt upp fyrir kvöldið og fóru í síðasta rennslið. Hin börnin vörðu síðdeginu á útisvæðinu og komu inn til að kæla sig í elsku Spilaborg sem er afar vinsæl hjá börnunum. Gott að flakka á milli.

Í kvöldmat var fiskur, kartöflur, smjör og tómatsósa og það var heldur betur stappað við sum borðin (ekki niður fótum) og borðað með bestu lyst og af list ...

Söngvara- og hæfileikakeppnin Ævintýrabarkinn var stórkostleg. Þvílíkir hæfileikar og mjög mjótt á munum hjá þessum frábæru krökkum.

Þátttakendur kvöldsins:

Áslaug Gyða, Inga Bjarney, Ólöf Rún, Telma Lind og Viktoría Líf sungu lagið Ást (Ragnheiður Gröndal) og dönsuðu sig í 3. sætið. Vel æft og mjög flott atriði.

Ásta Júlía og Una voru mjög frumlegar og á meðan önnur þeirra sýndi listaverk teiknaði hin eitt á staðnum og tónlist hljómaði undir.

Óðinn Benediktsson dansaði/breikaði.

Aldís Birta söng The Climb (Miley Cyrus).

Anna Lena söng Satellite (Lena).

Halldór Ívar söng Draumur um Nínu (Stebbi og Eyfi) og lenti í 2. sæti.

Dagný Freyja söng Is it true (Jóhanna Guðrún) og hafnaði í 1. sæti. Sigurinn kom Dagnýju Skagaskvísu heilmikið á óvart en eins og sönnum stjörnum ber að gera þá endurflutti hún lagið með stæl. Hún bauð öllum hópnum að koma á sviðið til sín og syngja með sér. „Þetta var alveg yndislegt,“ sagði sumarbúðastjórinn.

Allir fengu viðurkenningarskjöl og efstu þrjú sætin verðlaun.

Svo var það bara kvöldkaffið, brauð og safi, síðan hátt, burst og kvöldsagan góða; næstsíðasti lestur. Lokadagurinn og lokakvöldvakan fram undan ...

Sérlega miklar hæfileikakveðjur frá Kleppjárnsreykjum eftir dúndrandi stuðdag.

Myndir frá deginum hérna: 

http://sumarbudir.is/sumarbudir/t2d5.html

 

Húllumhæ í frábæru veðri

Vel var borðað í morgun af hlaðborðinu að vanda og svo var haldið á námskeiðin. Þau voru höfð fyrir hádegi að þessu sinni þar sem þetta var sjálfur húllumhædagurinn!

 

Námskeiðin gengu að óskum og spennan orðin mikil fyrir lokakvöldvökuna þar sem allur afraksturinn verður sýndur. Bæði hjá börnunum og starfsfólkinu.

 

Í hádeginu fengu börnin grjónagraut með kanilsykri og melónur á eftir. Nammi namm.

 

Á hádegisfundunum kom enn eitt dularfullt bréfið til hvers umsjónarmanns með mikilvægum skilaboðum. Umsjónarmennirnir neita að gefa nokkuð upp um efni bréfanna og börnin segja þetta vera algjört leyndarmál.

 

Síðan var húllumhæ-dagurinn settur með pomp og prakt.

Fánaleikurinn var æðislega skemmtilegur, barátta liðanna Draums og Martraðar um ... klemmur og Martröð hafði betur.

Rétt fyrir kaffi var sápukúlusprengikeppnin á útisvæðinu þar sem mikið fjör ríkti þrátt fyrir geggjaðan hita. Hægt var að fá bandfléttur í hár og hvaðeina. Sigurvegari sápukúlusprengikeppninnar var höfrungurinn Björn Breki.

 

Í kaffinu var boðið upp á nýbakaðar vöfflur ... með súkkulaðiglassúr og rjóma, eða sultu og rjóma, bara eins og hver og einn kaus.

 

Svo hélt bara gleðin áfram. Frá Borgarnesi kom hin ógurlega spákerling Jósefína Potter sem svaraði einni spurningu á mann ... flestir höfðu nú meiri áhuga á að vita hver kerla væri en hvað hún segði og sumir héldu því fram að þetta væri bara hún Snæfríður umsjónarmaður dulbúin. Hmmmm. En þetta var samt ógurlega skemmtilegt.

Það var skartgripagerð og það var tattú, andlitsmálun, keilukeppni (Wii), bandfléttur og vinabandagerð.

Allir fundu eitthvað við hæfi sitt fram að kvöldmat þar sem var boðið upp á grillaðar pylsur með tómat, sinnepi og steiktum, bara æði.

 

Eftir mat var stórskemmtilegt bíókvöld og í kvöldkaffi var náttúrlega popp og safi. Síðan var það kvöldsagan og þar á eftir draumaland. Góður og viðburðaríkur dagur á enda runninn.

Okkar allra bestu húllumhækveðjur frá Kleppjárnsreykjum úr góða veðrinu!

 

P.s. Myndir frá deginum: 

http://sumarbudir.is/sumarbudir/t2d4.html

 

 

Diskófjör með meiru

Eftir að hafa borðað staðgóðan morgunverð af hlaðborðinu góða voru opnar stöðvar.

Íþróttahúsið, útisvæði, Spilaborg og sund. Karaókíæfingin var á sínum stað og einnig var í boði að fara í kertagerð. Hin glæsilegustu kerti voru búin til og skreytt fagurlega m.a. með glimmeri, baunum og hrísgrjónum eins og sést á myndinni hægra megin.

 

Morguninn leið hratt og allt í einu var bara kominn hádegismatur. Í matinn var núðlusúpa og smurt brauð með ýmsum áleggstegundum, m.a. eggjum og kæfu.

 

Strax á eftir voru haldnir hádegisfundir þar sem dularfullu bréfin voru enn til umfjöllunar en í morgun fengu umsjónarmennirnir annað bréf sem innihélt merkileg skilaboð til barnanna. Enn er þessu öllu haldið leyndu ... og framhald verður víst á þessu laumuspili á morgun.

Fundirnir voru stuttir að þessu sinni þar sem leikrit var sýnt í íþróttahúsinu og þangað þustu börnin. Þetta var leikritið um Ping og Pong sem gáfu góð ráð úr vélinni Góðráð. Það fjallaði um einelti og Heiða fékk góð ráð við ýmsum ástæðum sem hún lenti í. Heiða fór t.d. í próf og trúði því ekki að hún gæti svarað einni einustu spurningu rétt en Ping og Pong gátu stappað í hana stálinu. Þeir voru líka mjög fyndnir.

Svo komu Sing og Song og þeir voru nú ólíkir. Song sagði Heiðu að addan endilega öllum á Facebook en Sing var sannarlega ekki á sama máli. Börnin héldu greinilega með Sing, sem betur fer. Svo kom einhver karl akandi á bíl og bað Heiðu um að hjálpa sér með pínulitla hvolpa þar sem mamma þeirra væri dáin og hann þyrfti að fara með þá til dýralæknis. Heiða var heilmikið að hugsa um að hjálpa litlu hvolpunum og fara upp í bílinn hjá manninum. Song sagði að maður ætti alltaf að fara upp í bíl með ókunnugum en Sing mótmælti harkalega, sem og börnin í salnum sem skellihlógu að bullinu í honum. Davíð lék þennan vitlausa Song en María lék Sing. Án efa verður mikið rætt um leikritið á hádegisfundunum á morgun.

 

Síðan tóku námskeiðin við fram að kaffi en börnin fengu sumarbúða-sandköku og melónur. Í kaffinu var líf og fjör en Þorgerður, eðalstarfsmaður í eldhúsi og söngnemi, varð tvítug í dag. Börnin sungu afmælissönginn fyrir hana og gerðu það mjög fallega. Það var látið duga að sinni en á miðvikudaginn verður einn Höfrungurinn 11 ára og þá verður slegið upp mikilli veislu. Kannski syngur Þorgerður fyrir afmælisbarn miðvikudagsins?

Þau börn sem voru skráð á reiðnámskeið fóru í dag til Guðrúnar Fjeldsted reiðkennara í reiðkennslu og tóku með sér nesti, brauð, ávexti og safa. 

Eftir kaffi voru það íþróttahúsið, útisvæðið og Spilaborg og undir kvöldmat fóru þau í herbergin sín til að klæða sig upp fyrir kvöldið ... í diskógallann ... diskótek fram undan og gríðarlegt fjör. Flott tónlist, reykvél til að magna stemmninguna og fjörugir krakkar. Mögnuð blanda.

Í kvöldmat var steiktur fiskur, hrísgrjón og val um karrísósu eða súrsæta sósu. Nammmmm!

 

 

Síðan var haldið á ball ... dansinn dunaði og þegar börnin fóru fram til að kæla sig var boðið upp á tattú og bandfléttur. Frekar kúl.

 

 

Kvöldkaffið, brauð og safi, rann ljúflega niður og eftir kvöldsöguna var aldeilis gott að sofna eftir viðburðaríkan dag.

 

 

Okkar allra bestu diskó- og stuðkveðjur frá Kleppjárnsreykjum.

 

Myndir dagsins koma hér, tímabil 2, dagur 3:

http://sumarbudir.is/sumarbudir/t2d3.html  

 

 

Leyndardómsfull skilaboð á hádegisfundum

Annar dagurinn hófst með hlaðborði þar sem hægt var að velja um brauð og álegg, súrmjólk, kornflakes og hafragraut - bara dýrlegt að geta valið úr eða bara smakkað á öllu. Gott að vera vel saddur og með næga orku fyrir ævintýri dagsins. Börnin tóku líka vel til matar síns.

Fyrsta karaókíæfingin var haldin eftir morgunverð en það er vinnuheitið á æfingum fyrir Söngvara- og hæfileikakeppnina Ævintýrabarkann sem alltaf er haldin næstsíðasta kvöldið, sem sagt sólarhring á undan lokakvöldvökunni. Börnin sem ætla að taka þátt velja sér lög til að syngja (í karaókí ókei), semja dans, æfa brandara og annað í þeim dúr, bara gaman. Hin börnin gátu valið um að fara út í íþróttahús, vera á útisvæðinu, í Spilaborg eða fara í sund. Mikið fjör á öllum stöðvum.

Í hádegismat var kakósúpa með tvíbökum og ávextir á eftir.

Síðan var haldið á hádegisfund. Þá sest hver hópur niður með umsjónarmanni sínum og farið er yfir málin. Sagt frá dagskrá dagsins, farið í leiki eða spjallað um áríðandi málefni og eitt málefnið þetta hádegið var sannarlega áríðandi hjá hópunum. Umsjónarmennirnir voru vaktir um morguninn á undarlegan hátt - eða með því að bréfi var kastað í þá. Ekki sáu þeir hver bréfberinn var en umsjónarmennirnir opnuðu bréfin á fundunum og þar voru mikilvæg, leyndardómsfull skilaboð til barnanna. Einnig fylgdi með að annað bréf kæmi á morgun með framhaldsskilaboðum. Ekkert smá dularfullt.

Svo var skundað á námskeiðin. Dansinn var æfður stíft, enda er stefnt á glæsilega sýningu á lokakvöldvökunni. Sama má segja um önnur námskeið, mikil sköpun í gangi hjá öllum og bara rosalega gaman. Grímurnar eru að þorna og hægt að mála þær fljótlega eins og sjá má á myndinni hér til hægri. Og á myndinni til vinstri fer María á kostum í leiklistinni. Mikið verður spennandi að sjá hvað verið er að æfa í öllum hornum. Börnin halda öllu leyndu en við reynum samt að njósna pínulítið næstu daga til að geta bloggað um herlegheitin.

Í kaffinu var boðið upp á sandköku og tekex með heimalöguðu appelsínumarmelaði a la Sigurjóna snilldarkokkur og það var ekki síðasta snilldin þennan daginn ...

Útisvæðið, þar sem var teygjutvistað út í eitt, og iþróttasvæðið, þar sem trampólínhopp yfir á dýnu sló í gegn, voru í boði og síðast en ekki síst ... da ra ra ...

... hin vikulega og stórskemmtilega, sérdeilis frábæra hárgreiðslukeppni. Bæði strákar og stelpur tóku þátt, sumir voru módel og aðrir hárgreiðslumeistarar. Úr vöndu var að ráða fyrir dómnefndina sem loks komst að niðurstöðu og hér koma úrslitin:

1. sæti: Írena Sól Lindudóttir og Sandra Steinunn Fawcett (módel). Sjá mynd.

2. sæti: Inga Bjarney Óladóttir, Telma Lind Bjarkadóttir og Ólöf Rún Óladóttir (módel)

3. sæti: Ragnheiður Röskva Teitsdóttir og Andrea Helga Ósk Jónasdóttir (módel)

Ævintýralegasta greiðslan: Ásdís Linda Pétursdóttir og Anna Lena Halldórsdóttir (módel)

Frumlegasta greiðslan: Anna Kristín Ægisdóttir og Karen Thelma Viðarsdóttir (módel)

Töffaðasta greiðslan: Anton Breki Snæþórsson, Gabríel Marinó Róbertsson og Halldór Ívar Stefánsson (módel)

Tíminn leið ógurlega hratt og allt í einu var bara komið að kvöldmat. Ilmurinn úr eldhúsinu var svooo lokkandi, enda voru heimabakaðar pítsur í matinn og alveg svakalega góðar!

Þótt allir væru pakksaddir eftir matinn þýddi það ekki að börnin legðust á meltuna uppi í sófum, onei, haldið var út í íþróttahús og farið í brenniboltakeppni milli hópanna. Hún var æsispennandi og náðu Sæljónastelpurnar sigri og  Höfrungastrákarnir lentu í öðru sæti.

Svo var komið að mjög spennandi atriði ... sjálfum draugaleiknum. Æsispennandi hraðakeppni sem var fólgin í því að hlaupa í einum spretti frá mötuneytisdyrunum að „draugaherberginu“, komast í gegnum dimmt, reykfyllt (jamm, reykvél á staðnum) herbergið fullt af „draugum“, fara með höndina ofan í slímugt, grútskítugt vatn og ná þar í stein sem þurfti að skila til eins starfsmanns, hlaupa síðan ofboðslega hratt í gegnum herbergið, (var ég búin að segja að hávær, draugatónlist hljómaði?) og komast á upphafsreit eftir skræki og hlátur. Þetta tókst öllum ... sumir fengu verndara með sér en aðrir vildu ekki sjá slíkt. Höfrungar voru sigurvegararnir og Sæljón lentu í öðru sæti. Þetta var svo gaman og mikið hlegið þegar aðaldraugurinn, hann Geir umsjónarmaður, tók niður grímuna. Aðstoðardraugar voru Alena, Apríl og Dagbjört.

 

Ávextirnir í kvöldkaffinu runnu ljúft niður og mikið var spjallað og hlegið eftir ævintýri kvöldsins. Svo var bara háttað og burstað og síðan hlustað á kvöldsöguna hjá umsjónarmanninum.

Algjörar ævintýrakveðjur frá Kleppjárnsreykjum!

 

P.s. Nýjar myndir eru komnar inn, endilega kíkið:

http://sumarbudir.is/sumarbudir/t2d2.html 

P.s. 2: Mynd t.h.: Þríburarnir okkar.